Rand Water sê die Vaal Rivier is gereed vir die Feesgety

VAALDRIEHOEK - Rand Water sê dat danksy ’n samewerkingsooreenkoms met die gemeenskap langs die Vaalrivier, is die waterslaai-infestasie onder beheer, en kan inwoners die rivier tydens die feesgety ten volle benut. Volgens woordvoerder Makenosi Maroo het die waterslaai sedert September drasties afgeneem van 100ha tot minder as 1ha. Hierdie sukses is te danke aan die gemeenskap se aktiewe betrokkenheid, insluitend fisiese verwydering van die plante en beperkte gebruik van onkruiddoders. Die Departement van Water en Sanitasie, Rhodes Universiteit se Sentrum vir Biologiese Beheer, en ander vennote het ondersteuning gebied. Vier permitte is goedgekeur vir chemiese middels, maar hierdie word slegs as ’n laaste uitweg gebruik. Een inwoner het meer as R5-miljoen uit sy eie sak gebruik om die waterslaai te help bekamp. Die Vaalrivier bly ’n kritieke waterbron vir 19-miljoen mense, en hierdie pogings help om die stelsel skoon en funksioneel te hou. Rand Water sê die Vaalrivier is nou skoon genoeg vir inwoners om dit veilig te geniet gedurende die vakansie.