Johan Heyns Gesondheidsentrum in Vanderbijlpark word opgradeer

VANDERBIJLPARK - Die Gautengse Departement van Gesondheid het aangekondig dat opknappingswerk by die Johan Heyns Gemeenskapsgesondheidsentrum vanaf vandag, 3 Maart 2025 sal begin. Dit is deel van 'n lopende projek om die fasiliteit in 'n distrikhospitaal te omskep om die toenemende gesondheidsorgbehoeftes in die Emfuleni Plaaslike Munisipaliteit aan te spreek. Die Johan Heyns Gemeenskapsgesondheidsentrum bedien tans maandeliks 8,000 pasiënte, insluitend dié uit nabygeleë nedersettings in die Vrystaat. Weens vinnige bevolkingsgroei is Sebokeng Streekshospitaal en Kopanong Distrikshospitaal oorweldig, wat tot 'n tekort aan hospitaalbeddens lei. Die opgradering sal gesondheidsorgtoegang verbeter en die druk op hierdie hospitale verminder. Gedurende die opknappingsperiode sal Johan Heyns vanaf 07:00 soggens tot 16:00 smiddae op weeksdae bedryf word en steeds noodsaaklike dienste soos chroniese sorg, moeder- en kindergesondheid en MIV-behandeling lewer. Ander dienste sal na nabygeleë fasiliteite herlei word. Die departement doen 'n beroep op gemeenskappe om geduldig te wees terwyl die opknappingswerk in fases voortduur tot 2028.