Derde sluis by Vaaldam oopgemaak om uitvloei te beheer

VAALDRIEHOEK - Die Departement van Water en Sanitasie sê hy het ‘n derde sluishek by die Vaaldam oopgemaak te midde van die voortdurende swaar reënval. Die departement sê dit maak dit moontlik om uitvloei tot sowat 400 kubieke meter per sekonde te verhoog terwyl daar ook tred gehou word met die stygende invloei stroom-op wat deur die aanhoudende reën veroorsaak word. Die dam het tans ‘n kapasiteit van 107,3%. Die departement se Wisane Mavasa sê die huidige wateruitvloeiings deur die drie sluishekke is steeds binne die veilige operasionele perke en sal na verwagting nie tot die oorstroming van rivieroewers stroom-af lei nie. Mavasa sê mense wat stroom-af en naby rivieroewers woon, word steeds gemaan om versigtig te wees.